හිටපු ක්රිකට් නායක තිලකරත්න දිල්ෂාන් මහතා නාරාහේන්පිට පිහිටි මධ්යම අපරාධ විමර්ශන කාර්යාංශය වෙත ගොස් අද දින නිල පැමිණිල්ලක් ගොනු කළේය. අත්අඩංගුවේ පසුවන මහා පරිමාණ මත්ද්රව්ය ජාවාරම්කරුවෙකු වන ශිරාන් බාසික් සමඟ තමන්ව සම්බන්ධ කරමින් සමාජ මාධ්ය ජාලා ඔස්සේ අසත්ය සහ අපහාසාත්මක ප්රචාර ගෙන යන බවට ඔහු එහිදී චෝදනා කළේය.
පැමිණිල්ල ඉදිරිපත් කිරීමෙන් අනතුරුව මාධ්ය වෙත අදහස් දක්වමින් දිල්ෂාන් මහතා සඳහන් කළේ, ඇතැම් පුද්ගලයන් සහ සමාජ මාධ්ය පිටු හුදෙක් ප්රසිද්ධිය ලබා ගැනීමේ අරමුණින් තම කීර්තිනාමයට දැඩි හානියක් සිදු කරන බවයි. තමන් කිසිදු නීතිවිරෝධී ගනුදෙනුවකට හෝ ක්රියාවකට සම්බන්ධ නොවන බව ඔහු අවධාරණය කළේය.
“කීර්ති රත්නායක සහ රාජාංගනයේ හිමි යැයි කියාගන්නා අයෙකු ඇතුළු පිරිසක් මගේ රුව යොදාගෙන අසත්ය ප්රචාර පතුරුවනවා. රට වෙනුවෙන් වසර විස්සක් ක්රීඩා කර ලැබූ ගෞරවයට මේ ආකාරයෙන් අපහාස විඳීමට මට සිදුව තිබෙනවා,” යනුවෙන් ඔහු පැවසීය. මෙම අසත්ය ප්රචාර හේතුවෙන් තම පවුලේ සාමාජිකයන්, විශේෂයෙන්ම ක්රිකට් ක්රීඩාවේ නිරත වන තම දියණිය දැඩි මානසික පීඩාවකට ලක්ව ඇති බවද ඔහු වැඩිදුරටත් සඳහන් කළේය.
සිද්ධිය වාර්තා වන අවස්ථාවේ තමන් දිවයිනෙන් බැහැරව සිටි බවත්, ලංකාවට පැමිණි වහාම නීතිමය පියවර ගැනීමට කටයුතු කළ බවත් දිල්ෂාන් මහතා පැවසීය. තමන් සියයට සියයක් නිර්දෝෂී බව පවසන හිටපු නායකයා, තමාට සිදු වූ හානිය සම්බන්ධයෙන් නීතිඥ උපදෙස් මත ඉදිරි පියවර ගන්නා බවද අවධාරණය කළේය.
