ශ්‍රී ලංකා සංචාරක හා හෝටල් කළමනාකරණ ආයතනය (SLITHM) විසින් හඳුන්වා දුන් හෝටල් සහ නිකේතන කළමනාකරණ ගෞරව උපාධි පාඨමාලාවේ සමාරම්භක උත්සවය පසුගියදා කොළඹදී පැවැත්විණි. අග්‍රාමාත්‍ය ආචාර්ය හරිනි අමරසූරිය මහත්මියගේ ප්‍රධානත්වයෙන් පැවති මෙම උත්සවය සඳහා සිසුන් 65 දෙනෙකුගෙන් සමන්විත පළමු කණ්ඩායම එක්ව සිටියහ.
මෙම අවස්ථාව අමතමින් අග්‍රාමාත්‍යවරිය සඳහන් කළේ, වෘත්තීය පුහුණු මධ්‍යස්ථානයක් ලෙස පැවති ආයතනයක් උසස් අධ්‍යාපන ක්ෂේත්‍රයට දායක වන ආයතනයක් දක්වා පරිවර්තනය වීම ඓතිහාසික සන්ධිස්ථානයක් බවයි.
සංචාරක කර්මාන්තය යනු හුදෙක් ආර්ථික ක්‍රියාකාරකමක් පමණක් නොව, සංස්කෘතීන් අතර පාලමක් සහ ජාත්‍යන්තර සබඳතා ගොඩනඟන වේදිකාවක් බවද ඇය පෙන්වා දුන්නාය. දේශීය ව්‍යවසායකයන් දිරිමත් කරමින්, තරුණ පරපුර සවිබල ගැන්වීමට සහ කාන්තාවන් සඳහා වැඩි අවස්ථා නිර්මාණය කිරීමට කර්මාන්තය තුළ ඇති හැකියාව ඇය අවධාරණය කළාය.
2030 වසර වන විට සංචාරක ක්ෂේත්‍රය වෙනුවෙන් රජය අපේක්ෂා කරන අභිලාෂයන් සාක්ෂාත් කර ගැනීම සඳහා යටිතල පහසුකම් සංවර්ධනයට පමණක් නොව, ඉහළ නිපුණතාවලින් යුත් ශ්‍රම බලකායක් සහ නව්‍ය චින්තනයක් අත්‍යවශ්‍ය බව අග්‍රාමාත්‍යවරිය වැඩිදුරටත් පැවසුවාය.
මෙම උත්සවය සඳහා විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතා ඇතුළු රාජ්‍ය නිලධාරීන්, විශ්වවිද්‍යාල ප්‍රතිපාදන කොමිෂන් සභාවේ නියෝජිතයන් සහ සංචාරක ක්ෂේත්‍රයේ ප්‍රවීණයන් එක්ව සිටියහ.
