මඩකලපුව නගරයේ පිහිටි පැරණිතම පාසලක් වන ආනෛපන්දි හින්දු කාන්තා විද්‍යාලයේ සංවර්ධන කටයුතු වෙනුවෙන් රුපියල් මිලියන 45ක ප්‍රතිපාදන වෙන් කර ඇති බව ප්‍රාදේශීය සංවර්ධන කමිටු සභාපති සහ මඩකලපුව දිස්ත්‍රික් පාර්ලිමේන්තු මන්ත්‍රී කන්දසාමි ප්‍රභූ මහතා පවසයි.
පාසලේ පවතින යටිතල පහසුකම් ගැටලු විසඳීම සඳහා මඩකලපුව මහනගර සභා මන්ත්‍රී තුදීශ්වරන් මහතා කළ ඉල්ලීමකට අනුව මෙම අරමුදල් ලබා දී ඇත. පාර්ලිමේන්තු මන්ත්‍රීවරයා විසින් පාසලේ මේ වන විට සිදුවෙමින් පවතින ඉදිකිරීම් කටයුතු නිරීක්ෂණය කර තිබේ.
මෙම ව්‍යාපෘතිය යටතේ පාසල සඳහා දෙමහල් ගොඩනැගිල්ලක් ඉදිකිරීමට නියමිතය. එහි පළමු අදියර ලෙස පහළ මහල ඉදිකිරීම සඳහා රුපියල් මිලියන 20ක් දැනටමත් වෙන් කර ඇත.
ඉදිරි වසරේදී ගොඩනැගිල්ලේ ඉහළ මහල ඉදිකිරීම සඳහා රුපියල් මිලියන 25ක මුදලක් වැය කිරීමට නියමිත බව මන්ත්‍රීවරයා සඳහන් කළේය. එසේම, ඉදිරි අයවැය හරහා පාසලේ අනෙකුත් අවශ්‍යතා සපුරාලීම සඳහා තවදුරටත් අරමුදල් ලබා දීමට පියවර ගන්නා බවද ඔහු වැඩිදුරටත් පැවසීය.
